goodorange

包包生活多樂趣廣告日誌

2009-04-14T08:45:00.000-07:00

大家好，我係包包。
好明顯，我係狗一隻。
我嘅生活有幾樂趣無窮？等我話你知！
我冇整容囉。
我冇走音囉。
我冇爆粗囉。
我冇掉蕉囉。
我冇影淫照囉。
我冇去飯局囉。
我冇分手囉。
我冇復合囉。
我冇食大麻囉。
我冇分身家囉。
嘩聽落連我自己都覺得好悶，你都係睇返東週啦！

東週刊

從領袖的角度看飯島愛的死亡

2009-03-27T10:09:00.000-07:00

從領袖的角度看Laughing哥的死亡

飯島愛被發現陳屍於東京都澀谷區櫻丘町的家中，相信很多飯島愛影迷得知後都淚流滿臉，單是在討論區看見永遠懷念飯島愛人數，就可見飯島愛的死對她的影迷有多大震撼。

飯島愛作為一名AV女優的確十分出色。但若從領袖的角度去看飯島愛，她亦表現出一位領袖生命中一些重要的元素。這些元素從她生前的經歷赤祼祼地表現出來。

1. 飯島愛清楚看見自己的異象（Vision或稱願景），她盼望把AV這個行業質素和可能性提升，藉以擴大對社會男性及女性的貢獻。這個清楚的異象，為她設定了清晰的工作目標。亦因為這個異象使她有能耐在AV界當女優。真正的異象使領袖有完成目標的能耐。

2. 具備完成任務的才智。飯島愛在AV界已慢慢熟悉娛樂事業的運作，而且也掌握在娛樂界生存和使之能完成任務的必要才能，加上她為人靈活變通，才智就因此被練出來。作為領袖必須學懂在困難的環境中，鍛煉自己的才智，學習一切有助完成目標的相關知識。

3. 傳承知識。飯島愛在與拍攝中的對手演員，常常明示暗示地傳授一些有助完成目標的知識給對方。作為領袖，必須明白目標完成，常常是要透過大家的合作，而AV演員間知識的傳授，往往會加快拍攝的完成，也能使演員本身不斷成長。飯島愛對AV的知識傳授，不單只在拍攝時發生，在她死前，普羅大眾便爭相去看她的自傳「柏拉圖式性愛」，也是為完成目標，而傳遞知識的一種表現。

4. 目標為先，個人榮辱為後。飯島愛在生前明白自己不能一直停留在AV界，但其他年輕女優可以繼續，故在92年轉當電視主持時開始將重任委托其他AV女優繼續。作為領袖，必須明白自己的限制所在，當自己不可能完成目標時，把重任委托他人是必須的，因為目標的完成比目標由誰完成重要。當飯島愛知道男演員發炮失準時，會叫他們「補她一槍」，而且將鏡頭對準在她自己臉上，使男演員能夠身處更有利的位置，使拍攝更容易完成。這就是一種領袖為成就異象而不怕自我犧牲的高尚情操。作為領袖，這種犧牲小我，完成大我的精神是必須要的。

老實說，正正因為飯島愛這種犧牲的精神，和異象、知識的成功傳遞，才使那些常常「亂來」的男性明白自己被大自然委托的重任，到底有多重要。與飯島愛的相遇也使少男們變得更強，對完成大自然賦予的任務的意志更堅定。領袖學權威John Maxwell 說：「領導力就是影響力。」飯島愛的影響力就是這樣進入了男性的生命，使他們被更新改變。

你願意成為第一人嗎？

2009-02-08T08:00:00.000-08:00

“睇見啲小朋友玩得咁開心，我就好滿足喇！“
“佢地只係得到一粒糖都咁開心，令我覺得我地平日生活太唔知足！“
“佢地冇因為自己咁艱苦嘅生活而唔開心，令我好感動“
“我地嘅生活太物質喇，搵唔返呢啲咁純真嘅笑容“
“開心其實好簡單，但係我地好多時都忽略左，唔識珍惜我地擁有嘅野“
“只係需要食少一餐飯就幫到佢地好多，點解唔畀個希望佢地呢？“

飢饉三十，並非什麼新鮮事，但係對每個飢饉之星，總好似發現新大陸般有好多人生道理當手信帶畀大家。
貧窮唔係今日先有，第三世界生活有幾艱苦電視間唔中會話你知，但係點解經過咁多年不同機構幫助，仍然有大量人生活於赤貧線？捐款究竟幫到幾多？有幾多捐款真正落入民間？第三世界政府點解冇辦法脫貧？我地係咪有份剝削佢地？點解飢饉唔探討呢個問題？捐錢就係唯一解決辦法？

以貧窮所引發嘅生活問題作為「賣點」呼籲大家踴躍捐輸，為貧窮嘅人改善生活，為呢班小朋友實現願望。但係貧窮背後成因，從來冇飢饉之星願意探討。你願意成為第一人嗎？

飢饉三十官方網站

腦你有冇？

2008-11-10T10:07:00.000-08:00

女：媽咪話慳得一蚊得一蚊，今個禮拜飛去倫敦慳左幾蚊，二千幾咋，不如一家人一齊去倫敦咯！
媽咪：慳得嗰幾蚊把鬼！咪諗住昆我去旅行呀！
女：咁我搵jackeline一齊去啦！
媽：jackeline！？邊個黎㗎！？
女：連jackeline你都唔識！？有jackeline，冇暗瘡喎！
媽：咁勁？我都試吓搵佢搞搞啲瘡先！

creativity，係咪真係幫到個好唔吸引嘅product？而一個唔太吸引嘅product，唔用creativity係咪又一定幫唔到呢？

申延閱讀：自己搵啦，呢期應該大把。

吠爆你！

2008-11-02T19:59:00.000-08:00

睇我個樣就知我幾惡！隨時吠爆你！
唔識嘅蛋散（警察除外）㩒門鐘，吠爆你！
唔識嘅狗同我玩，吠爆你！
貪得意摸我個頭，吠爆你！
嘈住我瞓，吠爆你！
唔陪我瞓，吠爆你！
隔離屋開門，吠爆你！
幫我擦牙，吠爆你！
梳化有條罅，吠爆你！
窗口有雀，吠爆你！
唔同我玩，吠爆你！
同我爭嘢玩，吠爆你！
唔畀嘢我食，呀...搵餐晏仔啫，唔使咁惡嘅！

(特別嗚謝：la belle epoque stitching workshop --- 唔好問我個名點讀，我都唔識讀！）

專業推介，武器七大

2008-10-29T10:39:00.000-07:00

緊貼港人走勢，擴闊暴力空間，統計逼迫特區政府過去一週七種最高殺傷力武器，鉅細無遺。

第七位：摺櫈
曾高據七武器之首位達多個週次，可惜後勁不繼，未能造出更大範圍殺傷力，本週停留第七位。

第六位：殘奧
雖然未能打進三甲位置，長期於下游位置徘徊，但仍然殘害不少身體有缺陷奧運參賽選手，包括奧運輪椅火炬手曾蠍子。

第五位：豆腐渣
剛派台時威力驚人，進佔榜首之位多達兩個月之久，總傷亡率亦為今年派台武器中暫時最高。但官方為配合另一派台武器「奧運」，被迅即壓至第五位，上訴無門。

第四位：I Kill You Later
上年以“Accumulator“之名派台時，成績未見理想。上週改派新版本“I Kill You Later”後旋即登上第四位，殺傷力遍及多位達官貴人及其公司股價，預料會繼續發力上升，殺傷力擴大至一般市民。

第三位：迷你債券
上榜個多月，長期佔據三甲位置，更一度升上榜首。以債券之名重新打造的結構票據，成功對普羅大眾保守無知散戶造成強勁殺傷力，隨各銀行陸續公佈回購價後有力再上更高位置，預料仍會繼續高據三甲。

第二位：三聚氰胺
上年派台時因為只有寵物飼料版而未有對人類造成傷害，所以未能入榜，但今年以多個remix版，包括「三鹿奶」，「熊仔餅」，「麵包」，「芝士」等攻佔全球，再加特別版「嬰兒腎石」全線催谷，為全球人類帶來極大傷害及恐慌，更曾連續一個月雄覇榜首，風頭一時無兩。雖然本週稍微回落，但剛剛最新派台版本「雞蛋」有望令殺傷力進一步提升，重上榜首位置。

第一位：香蕉
有別於過往地雷埋伏式用法，以其曲線身形作直線投擲帶出難以估計攻擊角度，再加上充份利用其長度作口腔硬塞攻擊，將「香蕉」殺傷力幾何級數提升，令受害者心理及生理上皆造成極大創傷，所以一上榜即成為七武器之首，氣勢凌厲。

投票，投票，毛蟲都去投票

2008-09-07T04:21:00.000-07:00

除左草姑妹妹（應該未登記做選民），登記左嘅你都應該阻你幾分鐘時間去梗有一間喺左近嘅票站投票。
你覺得個個都揀唔落所以唔去投？選舉就係兩害取其輕，冇得揀你先驚！
你覺得投咗都唔會有咩改變？唔投就連改變嘅機會都冇喎！
你覺得呢排政府都冇乜大錯，所以唔使投？呢度唔係荷媽屋企，集集有咬嗌，但係有事你先怨當日冇參予過，畀政府行政壟斷晒冇聲出時就咪學紅姨掉電話呀！
你覺得呢個係小圈子選舉所以唔想投？冇人投就會真真正正變成小圈子活動，多啲人參予先可以擴闊小圈子！
你驚投完票有神秘團體問你投畀邊個所以唔投？你可以同佢做手語嘛！

一個選舉嘅結果可能唔及惠康啲米賣幾錢咁直接影響你生活，但係唔投可能第日你就知米貴！投啦！

我哋就係奧運

2008-08-09T08:06:00.000-07:00

「我哋」就係一群人類，一群人類就係社群，社群就係集體生活，集體生活就係民生，民生就係政治。

北京政府斥巨資舉辦的奧運開幕典禮，氣勢磅礡，萬人空巷，視覺效果震撼人心，務求在世人面前打造盛世強國掘起形象，讚嘆之餘亦不禁感嘆，中國要成為真正強國，能夠做到開放言論，種族包容，宗教自由，維護公義，照顧弱勢，尊重人權，保護環境等等，唔知要等幾多年？此時冷不防身邊友人搭訕：你真係好政治！

呢個時候可以答佢：政治就係奧運！

多謝TVB呢句年度tagline，用心良苦。

OBJECTION!（注意！好多字，眼瞓勿看）

2008-07-02T21:55:00.001-07:00

(明報) 07月 02日星期三 09:00AM
貴州省政府公安機關通報了黔南布依族苗族自治州甕安縣發生的騷亂，指不涉及包庇高幹子弟。

貴州省公安廳新聞發言人王興正說，在貴州省委、省政府的高度重視和領導下，目前事件已經平息，真相基本查明。

Objection! 一件睇落咁簡單嘅案件竟然要省政府高度重視下先查明到真相？調查命案真相唔係公安局基本職責咩？

王興正說，年6月22日零時27分，甕安縣公安局110指揮中心接到報警稱，在縣西門河大堰橋處有人跳河。雍陽鎮派出所接到110指揮中心指令後，迅速派值班民警趕赴現場，並通知119人員趕赴現場。

民警趕到現場立即展開救撈，因天黑施救條件有限，經持續緊張工作，於3時許將溺水女孩打撈上岸後，急救人員證實她已死亡。經向在場報警人劉某、陳某、王某詢問得知，溺水女孩名叫李樹芬，1991年7月生，係甕安縣三中初二（六）班學生。6月22日7時40分許，雍陽鎮責任區刑警隊又派員進行了現場勘查、屍檢和調查工作。

王興正說，現已查明，6月21日晚8許，李樹芬與女友王某一起邀約出去玩，同李樹芬的男朋友陳某及陳的朋友劉某等吃過晚飯後，步行到西門河邊大堰橋處閒談。李樹芬在與劉某閒談時，突然說：「跳河死了算了，如果死不成就好好活下去。」劉見狀急忙拉住李樹芬，制止她跳河。約十分鐘後，陳某提出要先離開，當陳走後，劉見李樹芬心情平靜下來，便開始在橋上做俯臥撐。當劉做到第三個俯臥撐的時候，聽到李樹芬大聲說「我走了」，便跳下河中。

Objection! 好地地約出去玩，突然會想死？心情可以大上大落如過山車，佢男友竟然未能察覺不突止，仲話要走先！而死者亦奇怪地有心事唔向近過七十一嘅陳姓男友講，反而同男友嘅劉姓朋友傾吐！更奇怪係劉姓朋友見死者心情平服就無啦啦走去做掌上壓而唔係好好照顧住死者當時心理狀況！佢趕住練習參加奧運？

劉見狀立即跳下河去救李樹芬。王某急忙打電話給陳某，並大聲呼叫救人。陳立即返回河邊，跳下河中幫忙施救，陳見劉已體力不支，便用力先將劉拉回岸上。王某、劉某隨即報警，並打電話通知了李樹芬的哥哥、甕安縣第二中學高三畢業生李樹勇。

Objection! 唔講唔知原來王姓朋友一直在現場！但係佢見死者情緒極不穏定都冇睇實佢，由得佢可以大聲講句“我走了“先跳落河！其實當時有兩位朋友在場，但仍然未能趕得及阻止死者跳河，難道條大堰橋有青馬大橋咁長，所以跑唔切阻止死者？而王姓朋友明顯未有跳落河救人，何解要等死者男友折返救起埋劉姓朋友先報警及通知家人？中間真係冇足夠時間判斷報警嘅可能性？當劉姓朋友奮力救死者時王姓朋友又做緊乜？嗌緊中國加油？

王興正說，事件發生前，甕安縣公安局根據調查結果，認為李樹芬死亡一事是自己跳河身亡，屬自殺，不構成刑事案件，並將調查處理意見及時告訴了死者家屬。死者家屬不能接受，認為有姦殺的嫌疑，要求進行ＤＮＡ鑒定。6月25日下午，黔南州公安局派出法醫趕到甕安對死者進行復檢，是溺水死亡，生前未發現有性行為。提取陰道分泌物，未檢出精斑。死者家屬當時表示認可，但不安葬死者，要求公安部門責令王某、劉某某、陳某某等人賠償50萬元。

Objection! 死者家屬同公安對死者跳河身亡事件睇法點解會有咁大差距？自殺同姦殺之間是否有他殺或誤殺嘅可能性？點解死者家屬執意認為死者係姦殺？有咩表面證據？雖然話冇驗出發生性行為，但係死者有冇被暴力對待，身上有冇其他可疑傷痕就冇交待！更令人費解係死者家屬何解要三人賠償？既然他們據稱都是死者好朋友，家屬們為何可以一口咬定他們害死死者？唔通傷心過度到失去判斷能力？靠估定靠害？

王興正說，7月1日，經反覆向死者家屬做耐心細緻的解釋，其所有家屬同意安葬，但要求下葬前再做一次屍體檢驗。現已決定，當晚遺體解凍後，貴州省、州、縣公檢法部門法醫將對遺體進行聯合複檢。當局一定會高度負責地做好檢查鑒定，並及時通報鑒定結果。

王興正在新聞發佈會上說，在整個事件處置中沒有任何人員死亡。

Objection! 政府方面冇任何在職人員死亡，但傳聞中死者家屬被公安打死一事點解冇公佈或澄清？

他說，6月26日，經縣工作組多次做工作，死者家屬表示同意縣工作組的協調意見，答應在6月28日簽訂協議了結此事。但6月28日下午4時，死者親屬邀約300餘人打著橫幅在甕安縣城遊行。由於當日正是周六，街上人較多，部分群眾尾隨隊伍前行，人愈來愈多。4時30分許，遊行人員到縣公安局辦公樓前聚集。公安民警拉起警戒線並開展勸說工作，但站在前排的人員情緒激動，在少數人的煽動下，一些不法分子用礦泉水瓶、泥塊、磚頭襲擊民警，並衝破民警在公安局一樓大廳組成的人牆，打砸辦公設備、燒毀車輛，並圍攻前來處置的公安民警和消防人員，搶奪消防龍頭，剪斷消防水帶，消防人員被迫撤離。

Objection! 死者家屬由廿六號同意協調意見到廿八號兩日時間內可以邀約到三百餘人遊行實在不可思議！請飲問幾十位親友到唔到都要打成個禮拜電話confirm啦，何況要請三百人！？而且因為周六條街人多，所以群眾隨尾前行，愈行愈多人，請問呢班人係咪患上羊群跟大隊症？唔知發生乜事都跟一餐？又唔見香港警方話七一遊行因為假期所以愈來愈多人行？點解咁多公安用咁多口水勸說會無效，但係少數人係咁二煽動一下就成班人慶烚烚？係邊方面溝通能力有問題？

8時許，不法分子對甕安縣委和縣政府大樓進行打、砸、搶、燒，一度衝擊鄰近的縣看守所，整個過程持續近7小時。

在此事件中，共造成縣委大樓被燒毀、縣政府辦公大樓104間辦公室被燒燬，縣公安局辦公大樓47間辦公室、4間門面被燒毀，刑偵大樓14間辦公室被砸壞，縣公安局戶政中心檔案資料全部被毀，42輛交通工具被毀，被搶走辦公電腦數十台，全部直接經濟損失正在統計中；事件中共造成150餘人不同程度受傷，大部分均為輕微傷。在整個事件處置中，沒有任何人員死亡。

Objection! 官方形容所謂不法份子破壞過程都鉅細無遺，但描述打撈死者過程就只用幾句“施救條件有限，經持續緊張工作，於3時許將溺水女孩打撈上岸”輕輕帶過，中間有咩困難，點緊張工作，有冇增援，最後用咩方法同打撈死者位置完全冇交待，點解？咦，你望下左邊！

他說，在事件過程中，不法分子用石頭、磚頭、酒瓶、汽油瓶、爆竹等襲擊維持秩序的公安民警和消防官兵，廣大公安民警和武警、消防官兵保持了極大的克制，做到了打不還手，罵不還口。

事件造成百餘名公安民警受傷，甕安縣委、縣政府和公安局被焚燒打砸，公共財產損失嚴重。

王興正說，在這一事件中，少數不法分子衝擊黨政公安機關，打、砸、搶、燒，已嚴重觸犯刑法。經公安機關的初步偵查發現，直接參與打砸搶燒的為首人員中，已發現多名當地惡勢力團夥成員，現已抓獲50餘人。

Objection! 剛才話遊行人士係死者家屬邀約嘅親友，而家又話入面有惡勢力團夥成員，係咪暗示死者家屬同惡勢力早有聯繫？點解死者家屬要動員惡勢力討回公道，唔通死者死因背後有不可告人嘅秘密？

對於有傳聞說，元兇是縣委書記的親侄女，另外兩個參加行兇的男生和派出所所長有親戚關係。還有傳聞說元兇是副縣長的孩子，王興正指縣委書記王勤不是甕安本地人，夫婦二人在甕安沒有任何親戚關係。經公安機關調查，事發時和死者一起玩耍的陳某、劉某、王某三人父母均在農村務農。因此上述說法不存在。

Objection! 如果三個人都係死者朋友，同高官冇關係，點解唔公開佢地姓名樣貌以供其他相死者朋友或家屬辨認以作澄清？定呢三位朋友都係online識，所以冇其他common friend？咦，其實好似冇講過佢地點認識喎！

如果呢件事係一個純屬虛構嘅故仔，係冇人會駁故嘅，大家會寧願睇TVB法證先鋒，起碼啲犯駁位冇咁離譜。

眾志城城為攻擊

2008-06-02T10:52:00.000-07:00

團結就是力量，齊心就事成。當人人都擁有同一個被害意願，萬眾一心集體發聲斥責，什麼事都能像美源髮彩般，立即變黑亦得，威力絕對驚人。

天譴論：上天要譴責當政者不仁的論說，被扭曲成嘲諷地震受害者活該的涼薄宣言。

Karma：荷利活女星從達賴身上學懂以德報怨的道理，被譯成自作孽，真有趣。其廣告商也急急為她發出道歉聲明。

董玉娣：因為一個跟其他人無關的網誌言論，最後被記上一個跟校規無關的大過。

陳巧文：支持西藏宗教自由，結果私生活成為爆料雜誌封面。

王千源：調解支持奧運聖火及藏獨人士紛爭的留美學生，最終引來父母家門口被潑糞和張貼恐嚇文字。

大殺傷力武器未必遠在伊拉克，其實就在我們的口中。下一個「邪惡軸心」又會是誰？

災 To The World

2008-05-16T09:23:00.000-07:00

有乜比一次天災更慘？就係發生多一次天災！由年頭的雪災到緬甸的風災再到四川大地震，接連的天災究竟給了我們什麼啟示？我們對各個災情的認知和關注又建基於什麼？面對災難我們又可以怎樣？請嘗試用以下字句組織：
天譴／涼薄／拒絕援助／克不容援／捐款／國難／聯合國／中共／憲法公投／傷亡人數／軍政府／醫院／物資／糧食／疫症／臨時停屍間／寺廟／僧侶／漢人／藏人／人性／OBE／生命探測器／衛星傳送／媒體／延誤／紅十字／解放軍／專家／生還者／人禍／新聞封鎖／重建／溫家寶／丹瑞／珍惜／反省／呼籲

雖然天災的降臨奪走很多生命，但也為我們種下更多反思的種子，但願在你心中能茁壯盛開。

(L)CHINA

2008-04-19T08:31:00.000-07:00

愛中國的人，請也愛愛這些中國人吧：
(L)胡佳 --- 一個為中國人爭取人權，關注中國愛滋病患者的人，結果被中國政府以“煽動顛覆國家政權罪“判有期徒刑三年六個月，剝奪政治權利一年

(L)維權律師 --- 為那些被中國政府貪官壓迫剝削的弱勢市民爭取應有權利，但卻被中國政府誣告甚至毆打

(L)礦難的死傷者 --- 被無良的礦商欺壓，得不到應有的勞工保障，無日無之的死訊令很多愛國的中國人都開始麻木

(L)山區的貧困家庭 --- 當中國的太空船／航天船都升空了，但他們的生活水平仍然原地踏步，醫療教育也得不到顯著改善

(L)環境污染下的老百姓 --- 中國政府努力發展經濟，不斷開發資源，近日終於取代美國成為世界第一溫室氣體排放國家，但因生態環境變壞而受影响的老百姓，卻沒有反抗的能力

(L)六四的死難者家屬 --- 多年來只求一個交待，一個道歉，但似乎遙遙無期

(L)拿不到獎牌的中國運動員 --- 他們的付出可能不比金牌運動員少，但有幾多可以在其短暫運動員生涯結束後還被國家重用？

愛中國的人，請認真愛護中國人，除了在MSN上打(L)CHINA外，我們還可以怎樣愛她／他？
愛中國的心，是否只可用來憎恨別人？

鳯告

2008-03-27T11:31:00.000-07:00

我們的政府，願你的權受顯揚，願你的財來臨，願你的政策奉行在人間，如同在中共。
求你今天賞給我們服務的客人，求你寬恕我們的職業，如同我們寬恕客人一樣，
不要讓我們陷於危難，但救我們免於凶殺，阿權。

究竟要作了什麼惡行，才不值得被救助？
究竟要犯了什麼禁忌，才不值得被原諒？
究竟是殺手冷血，還是站在道德高地的我們冷血？

造個勇敢中國人（25禁：內含大量80爛gag，未滿廿五歲人士請勿閱讀）

2008-03-15T12:30:00.000-07:00

大家好，又黎到方太與你嘅時間喇，今日我方太諗住教大家點樣造個「勇敢中國人」喎！其實造法好簡單，首先，要用一個煲，個煲唔係一般用鐵造嘅煲喎，要用軚造嘅，叫「軚煲」。軚煲唔係咁易喺市面搵到㗎，通常有鑊賣嘅時候就買唔到呢個煲嘅，有彩攞嘅時候就會易啲買到，咁大家要留心啲搵喇！

先將個煲放滿「民意」，扭著個「一國兩掣」，千祈唔好用普通煤氣煲佢喎，要用「勇氣」！煲佢七至八年左右，係呀，要煲七至八年咁耐㗎，不過時間關係，我已經預先準備好一個煲咗八年嘅民意喇！嗱你睇，啲民意煲咗咁耐，已經變成「民怨」喇，你睇啲口水泡把把聲咁標出黎，幾滾！

好喇，跟住我地可以放幾片「回鄉證」同落啲「敢鹽」落去，加幾多就視乎你個人喜好啦，鍾意國家多啲嘅人可以放多啲啦，唔鍾意咪放小啲囉。之後再加幾両「泛民」煮----埋一齊，再搵嘢搞勻佢！

嗱，用咩嘢搞就要小心喇，千祈唔好亂用工具搞喎，例如用「銘柱」搞就唔得喇，因為好容易搞到個煲分裂架！要搵一把遮搞，係喇，就係用「汪阿遮」搞，咁先可以將佢地搞勻㗎！但係搞嘅時候要留意，盡量要少說話，多搞事，咁就為之very good喇！

搞勻晒之後，最後就將佢地釀入大大小小唔同嘅「冤肉」入面三五七年，咁呢個「勇敢中國人」就完成喇！係咪好單簡呢？你都今晚返屋企試吓啦！

What's up Michael ?

2007-12-31T11:42:00.000-08:00

剛去世的大肥貓加得里奧，在天堂遊玩之際，一頭貓走過來跟他打了個照面。
加得利奧：你是誰？我認識你嗎？
米高：我是米高啊，在你經常流連的公園哪兒的流浪貓呢，你不認得？
加得里奧：你是米高？怎麼會弄成這個樣子！？左眼被挖掉，腦袋又爆開，肚子又被勒成兩截，怎會認得你呢？是誰把你弄成這樣啊？
米高：都怪自己倒霉啦，碰上一個腦袋有問題的人類，聽說他要虐待我們才能發洩自己的什麼暴力自卑情緒，他自己也控制不到自己！
加得里奧：哦，原來是腦袋生病，那也没辧法啦！但没有其他正常人類來救你嗎？
米高：你指那些叫警察的人類吧？我記得他們當時在附近遊蕩，但當腰間的黑箱子說起什麼“超連結“和“十四K“後，他們便連忙點頭，之後便消失了！
加得里奧：和黑箱對話？我想他們都是腦袋生病了！
米高：哪你為什麽來到這裡？你才兩歲大，這麼快便上來？
加得里奧：我家女主人自從肚子脹大了，男主人便帶我去一個地方，針了我一下，我便來到這兒了！
米高：肚子脹大便把你送上來？哪下次肚子再脹時送什麼上來！？我想他們腦袋都生病了！
加得里奧：可能所有人類根本都腦袋生了病啦？
米高：唉！人類真可憐！

不思議的謎題之都

2007-12-01T07:57:00.000-08:00

十二月二日將會有一名立法會補選議員產生，但誰是當選者呢？背後的動機是什麼呢？讓我們一起解開以下謎題，可能會發現不少線索！準備好了沒有？來一起挑戰謎題吧！

謎題001：普選非專利
在現今這個過份保護以商業利益掛帥的「知識產權」的香港，普選理應被列作專利產物，接受不同人士去申請其專利權，再由市民自願附出版權費才能享有。以下有四位人士也在申請普選專利，但其中一位在說謊，究竟是哪一位呢？
陳太太：全力支持2012年雙普選
葉太太：會盡力爭取2012年普選
柳先生：爭取明年立會普選
蔣先生：支持2012雙普選

謎題002：良心人人有
良心是每個人與生俱來的重要原素之一，否則不用違背「良心」幹壞事吧？既然人人都有良心，接下來就是良心的重量問題！現在有八個良心，它們的外形大小全部一樣，但其中一個良心比其他的輕，而天秤只能使用一次，請問怎樣才能找出哪個是較輕的良心呢？
A)何女士 B)凌女士 C)蕭先生 D)陳太太
E)柳先生 F)蔣先生 G)葉太太 H)李先生

謎題003：抺黑對象
甲方在一張白紙上寫下了一些對乙方不利的東西，乙方想把它刪除，但怎樣擦也擦不掉這些字跡，於是想到最快方法就是把整張紙塗黑，這樣一來所有人都不會留意紙上寫過什麼，除了那一片黑。假設你得到一種抺黑的超能力，而你面前有四種東西供你抺黑，應該抺黑哪一樣呢？
A) 陳太太的按揭
B) 葉太太的歉意
C) 李大狀的言論
D) 自己的良知

詸題004：隠藏鐵票
同學們聲稱支持甲當班長，但部份卻暗地裡把票投給乙，因為乙能直接和校方溝通，得到可靠考試題目。現在班上有五十二人，三十人聲稱會支持甲，二十人則支持乙，請問當中有幾多人會暗地裡把票投給乙呢？

如果你能成功解開所有謎題，那麼十二月二日的當選者應該不難猜出吧？可要認真想一想啊！

八珍姨話你知：奸人堅

2007-10-31T08:56:00.000-07:00

八珍姨睇左咁多年電視，邊個係人邊個係鬼我睇兩集都睇得出啦！最多係由忠嘅誤入歧途變奸或者係奸嘅良心發現變忠，冇乜變過！但係自從奸人堅呢套劇出街世界就開始變喇！

奸人堅明明就係奸架啦，但係睇睇吓佢又奸唔晒，有時會幫吓人，有時又奸得黎幾好笑喎，都唔知佢究竟係忠定奸！但係如果佢最後變忠，咁冇左奸人堅，要黃飛鴻黎做咩！？超人都要打怪獸啦，唔通打你？

現實世界就更加神奇，明明標榜自己係公信第一嘅明報，都可以突然變奸老屈李大狀呼籲世界領袖對中國施壓，再挑撥民主黨識時務同佢劃清界線，然後又變返忠話會捍衛李大狀嘅言論自由，反指華爾街日報用心不良，呢種忠奸極速變法，真係睇到八珍姨一時間都分唔清究竟明報係奸人堅定黃飛鴻？

八珍姨希望第日明報如果決定放棄公信第一呢個稱號就要奸得堂堂正正，光明磊落，行得奸，企得奸，唔使大家估得咁辛苦嘛！如果唔係睇大公報就得啦！

相關文章：事實勝於雄辯請《華爾街日報》弄清事實
民主黨還有智慧清醒的人

等價交換

2007-10-19T08:58:00.000-07:00

「人若沒有犧牲，便什麼也得不到」，要得到某些東西，便要付出對等的代價。
我想知，犧牲多少性命才能換得到緬甸的自由？
我想知，輸送多少石油才能換得到蘇丹的停火？
我想知，發生多少悲劇才能換得到天水圍北的和諧？
我想知，拆毁多少個社區才能換得到城市的文化？
我想知，付出什麼才能換得到普選？
我想知，如何用愛換取愛？

祈福黨

2007-09-27T10:00:00.000-07:00

據報，近日街上有大量祈福黨出現。他們年齡分佈非常廣，通常會穿著褐紅色衫赤腳於街上流連，用沉默手法向途人招手，聲稱會為他們祈福。根據資料顯示，已有近十萬市民受祈福黨所影響而妄顧一切走上街，險象環生，更造人命損失。我喺呢度呼籲廣大市民，如果你見到以上祈福黨或受影響市民，請不要猶豫，立即為他們祈福，你地每一個祝福都可能成為破獨裁嘅關鍵，多謝合作。

圖片來源：蘋果日報

先生，阻你幾分鐘時間

2007-08-05T10:27:00.000-07:00

“先生阻你幾分鐘時間，想同你講返香港嘅歷史...“
“我而家唔得閒喎！“
“咁唔知幾時方便呢？“
“收市你再打畀我啦！“

能夠抽時間認識自己城市，面對她的歷史，探索未來發展路向，所得實際盈利可能會比買十手中移動還要高。

請體諒那些抗爭到底的人，可能他們歌唱得很爛，可能他們的SOS橫額很醜，但能夠有勇氣去爭取自己認為有價值的事與物，引起大眾討論市城發展，這種熱血人可能比安安佳佳樂樂盈盈還稀有，請好好愛惜。

有勇氣趁個股市大跌時去入貨，點解無勇氣趁個城市大變前去出聲呢？

輕談淺唱不夜天

2007-07-01T11:27:00.000-07:00

Hi，時間黎到凌晨三點三十二分，歡迎你，收聽輕談淺唱，不夜天，我係DJ Donald....喺呢個，夜闌人靜嘅時份，仍然未訓著嘅，你，唔知，又做緊乜野呢？

係咪喺度回味緊，晏晝嗰場球賽？諗緊，點解高露斯個波，冇省中你，等你可以，放多幾日假？

定係，腦海入面，仍然盤旋緊幻彩詠香江，加煙花大匯演，一幕又一幕嘅，精彩情景？周圍嘅人，不停嘩，嘩，嘩，咁叫，你而家，耳仔仲聽到啲嘩，嘩聲，訓唔著？

又或者係，重溫緊，解放軍八一跳傘隊？睇住一個個，威風凜凜，嘅解放軍，孭住，色彩繽紛嘅，降傘，構成一幅幅，精緻嘅畫面？當時，心入面諗住，點解佢，唔降落喺，我個心度㗎？

喺呢個時候，我，DJ Donald，收到，一個點唱。係安安，同佳佳嘅，點唱。佢地想點，以下呢隻歌，畀，樂樂，同盈盈，祝佢地未來十年，活得，更開心，更愉快，最緊要係，食多啲，食多啲，食多啲。

遺棄的聲音又響起了
遺棄的感覺偏剩下多少
不聽 , 不觸摸 , 不痛楚
懶看 , 懶記憶 , 懶問我
今天得到的叫甚麼 ? 管不了
天 , 亦天天的了地 , 天天的了
心也未能料我已再不渺少
讓昨天一朝了 ,
或且某月某日某宵 , 我倦了.
人有幾多天拾起改變
人有幾多次堅定地向著前
一天清一天風雨飄
似了似了不了地了
他朝得到的縱是小不緊要 !
心亦天天的了夢天天的了
雖也未能料 , 但是我的決心
沒有點滴動搖
或且某月某日某宵……

無面互動GIV投票

2007-06-04T08:35:00.000-07:00

歡迎參加無面互動GIV投票環節！而家各位家庭觀眾可以透過電話投票發表你嘅意見！
今期我地嘅投票題目係：對於“六四屠城“，你有乜睇法？
A) 總知邊個做過自己心知肚明.....同我say sorry!
B) 仲狼過華秀隻狗
C) 舉頭三尺有神明呀
D) 呢度唔係法庭，唔需要證據，我對眼就係證據
E) 有口也是和，無口也是禾
F) 耳聽三分假，眼看未為真

香港嘅觀眾可以打*1989，再按#64就可以投票，廣東省嘅用戶可以試先打133，再打*1989後按#64便可（如有任何法律責任，本台概不負責）

八珍姨話你知：爭爭爭

2007-05-28T09:44:00.004-07:00

八珍姨呢期真係好唔得閒！點解？梗係趕住返去睇“溏心風暴“結局篇啦！細契關菊英發衡力咁爭家產，搞風搞雨，搞到家無寧日，真係舉頭三尺有神明呀！

八珍姨都認女人天生就係鍾意爭野，唔止家產，基本上爭得嘅野我地都唔會放過！無論係大減價爭掃平貨，搭車爭位坐，同狐狸精爭老公，同個仔爭學位定離婚爭撫養權，乜都可以爭一餐！有時爭可能為左贏，更大可能係為左啖氣。

好啦，細契為錢搏晒命爭家產最後都得個桔，大家應該睇得心都涼啦，但係另一個女人，昂山素姬，為國家爭民主被軟禁十幾年，連老公死都唔肯走，到而家都未知爭唔爭得贏，真係叫八珍姨睇到心都涼左一截！不過八珍姨都希望佢會爭贏啦，話晒大家都係女人，加油！

升旗易檔案 ﹣ 忍閉青年

2007-04-14T10:58:00.000-07:00

PG：以下訪問聲音經過特別處理，請家長自行想像
問 -- 問問題答 -- 答答案

問：幾時開始食到停唔到？
答：呀...幾個月前啦！
問：之前有冇食過？
答：都有㗎！但係冇而家咁多囉！
問：之前點解會食？
答：咁啲friend一齊出黎玩，佢地食開咯，咁我點都要食啲嘅！但係佢地好多時都會行埋一二邊食嘅，咁我咪唔會食囉！
問：點解而家食多咁多？你知唔知對身體有害？
答：我夠知啦！甩到先得㗎！而家一出親街就見到大把人都食喎！你唔食得咩？
問：咁你覺得問題喺邊？
答：政府囉！又叫人唔好食，但係又賣畀人食，玩咩！？我夠識嗌世界和平，轉頭去賣軍火啦！不過可以抽咁多稅，又真係幾好賺嘅！
問：咁你有冇野想同政府講？
答：唔好輸畀枝煙囉！

以上係二手煙民“薄荷曼“(化名)對政府由七月一日起舉行禁煙運動嘅訪問。

故事的角色

2007-04-05T12:13:00.000-07:00

少女 ...................... 瘋狂追星少女
劉華 ...................... 萬世巨星
少女母親 ............... 嫁雞隨雞婦孺
少女父親 ............... 支持愛女夢想，不惜一切
路人甲 .................. 被少女行為感動
路人乙 ................... 同情少女父親之死
路人丙 ................... 指罵劉華冷血
楊臣剛 ................... 仗儀相助藝人
傳媒 ...................... ？？？

一年來不斷以連續劇手法報導，把少女追星塑造成勵志感人小故事，卻對事件缺乏深入探討和分析，更惶論要引起社會關注及反省，令當事人得到適當幫助，直到悲劇發生，故事的角色仍不斷增加。究竟傳媒在社會應該扮演什麼角色？

相關文章：
楊父之死
我們欠一張網路通緝令！

飯民

2007-03-28T08:15:00.000-07:00

香港私隱專員公署就雅虎涉嫌泄漏內地新聞工作者師濤個人資料予中央政府事件作出調查，最後認為雅虎沒有違反條例，因為單憑IP地址和電郵地址不能顯示電腦使用者的身分，所以不算個人資料。

如果一個政府唔可以單憑IP地址同電郵地址查出用家身分咁神奇，佢地應該係唔小心請左一班飯桶！更神奇係雅虎擺明為虎作倀，私隱專員公署同UA一樣都話冇問題，呢個飯蓋亦唔係人人可以撐得住。

究竟有飯桶先定有飯蓋先呢？作為一舊飯民，真係搞唔清！

相關文章：雅虎泄師濤IP 私隱署指無違例指不屬個人資料

The best is yet to come

2007-03-25T09:21:00.000-07:00

有人話：「唉講真，就算畀我投票，我都會揀返曾蔭權啦！」
講真，真正選舉同一條MC題嘅分別係：你唔答條MC會冇分，但係你唔選佢會計算在內喎！

又有人話：「其實冇普選咪重好，揀左個衰嘅咪大鑊！」
冇錯！你唔揀，所以中共最啱做你老闆！

亦有人話：「曾蔭權都好慘嘅，佢身不由己啫！」
如果言論自由，官商勾結，貧富懸殊持續惡化，有一日損及你自身利益，希望你都會堅持佢係身不由己，唔好叫佢去死。

好似有人話：「唔知㗎，希望在明天嘛！」
希望最好的，尚未來臨啦！

朋友啊

2007-03-17T08:02:00.001-07:00

朋友，請不要東張西望，因為我不想當你的娛樂頭條；
朋友，請不要替我扣上任何帽子，因為我不想當任何人的模特兒；
朋友，請不用為我解開謎團，因為觀眾對真相從來都不感興趣；
朋友，請不要懷疑我的身份，因為無論我是什麼人，也絕不會傷害你；
朋友，我當你一世朋友。

珍寶珠

2007-03-01T10:13:00.000-08:00

珍寶珠，一般會被誤理解為糖食類或哺乳類動物。「珍寶珠」正名為「吹氣珍寶珠豬」，乃零長進類賀年科吹氣系靜物，上身呈球狀形態，帶有粉紅色系列的環形紋路，下身則以幼長條狀白色根莖支撐。珍寶珠豬會在冬天一至二月期間大量繁殖，主要生長於香港維多利亞公園一帶，由於體形比其他賀年科吹氣系靜物大，非常顯眼，故又有「阻碇大寶豬」之稱。繁殖後會於三個月內自動萎縮。

吹氣珍寶珠豬主治急性購物慾及妄想刺激經濟症，相比其他吹氣系靜物如吹氣水泡，吹氣足球及吹氣瑪利，吹氣珍寶珠豬只能作一次性治療效用，用完後只可棄掉或長期置於儲物間，絕不能轉贈予直系家屬或伴侶等病患者，否則吹氣珍寶珠豬會釋放出大量靠害怨氣。

圖片來源：http://blog.wonderspace.net/9/viewspace_450.html

波叔講股：高風險新年活動

2007-02-14T10:45:00.000-08:00

過去兩個禮拜，多得游資令大市大幅上落，唔少散戶都好似坐過山車一樣嚇到心驚驚。波叔奉勸大家，大市會升亦會跌，唔睇清楚就好易損手爛腳。豬年就快到，個市要休息幾日，散戶可以選擇抖順條氣再玩過，或者大手買入么鳯瓜子(0218)，八珍蘿蔔糕(0219) 同華麗園年糕(0221)，全部升磅潛力不俗，但切忌買入過多戲飛，特別是近期熱捧貨門徒(0213)及翻生侏羅館(0214)，因大量各階層新手湊熱鬧入場，隨時令戲院場內聲浪重上105.5分貝，影片淨值下跌超過45.7港元關口，投機風險極高，有心入場者應避免於7時至12時入場才有機會獲利回吐。最後祝各股民豬年豬籠入水，大市步步高升！

八珍姨話你知：菩薩都冇情講！

2007-02-02T10:23:00.000-08:00

八珍姨雖然年紀唔係細，但係都未大到停晒副偈，點都會有生理需要搵老公幫手解決（嫁畀佢時講明包埋架嘛！）。話說有一晚我專登著左件性感喱士睡衣，諗住過一個歡愉嘅晚上啦，點知個死佬一上床就同我講：我會做好呢份工！

一聽個人真係成身罄烚烚，即刻大嗌十八個字粗口（平時都冇嗌得咁落力咁迫真！），再問佢當我八珍姨係乜呀？點知佢再講：我都係想盡心盡力完成呢份工作啫！

聽完真係菩薩都冇情講！一腳伸佢出廳，叫佢去皇后碼頭度諗清楚先好返黎！

雖然嬲足晚成，但係第二日咪又係當冇事發生！鬼叫佢係我老公咩，有得揀咩？好彩佢唔係姓曾囉！

耐人尋味

2007-01-27T09:11:00.000-08:00

圖片來源：http://www.oldmasterq.com/

廣管局指港台反映同性戀社會狀況節目係鼓吹同性戀所以要强烈勸喻；又話秋天的童話中船頭尺的對白過份粗俗教壞細路要求刪除！但係推銷銷售稅時又無說明銷售稅的潛在問題，只求大力硬銷；曾特首强調「看得見，做得到」施政方針，漠視社會未來前景及城市規劃，如此不負責任教壞細路之言卻經常聽到，實在另人費解！我得出一個結論係：廣管局其實好少睇電視。

相關文章：肥醫生@西九龍貧民區：心繫家國的不公不完整和偏頗

最受歡迎女歌星融棗儀

2007-01-16T09:08:00.000-08:00

好開心得到呢個奬! 我喺度要多謝好多人！我要多謝many, 多謝我嘅唱片公司鷹黃EGG，多謝我嘅fan屎！仲有我要多謝一啲幫過我嘅人，包括Victor & Rolf，Alexander Mcqueen同Kylie Minogue，冇佢地唔會有今日嘅我！我明白觀眾有權話我抄，或者讚我抄得好，但係無論如何，我都會畀心機，盡我全力做到一模一樣，希望你哋所有人都唔覺得我係抄啦！多謝！

你地唔係抄我呀嘛？

抄襲誠可貴，創意價更高喎！

金句

2007-01-05T09:00:00.000-08:00

講金句，一定唔夠黎明多！但係零六年，原來都儲咗唔少金句，句句新鮮句句金。
一句，可以令我變成只顧自我娛樂嘅涼血動物；
一句，可以令我變成鬧人唔使本嘅賤精先生；
一句，可以令我發現朋友已待我如家人一樣；
一句，可以令我發現姨媽到的朋友竟然同可能已經冇姨媽到的姨媽有某程度相似；
一句，可以令我變成比利加兒更紅嘅爆笑談普通話主持；
一句，可以令我知道信任係建基於職級而非職銜；
一句，可以令我成為對公司落井下石嘅千古罪人；
一句，可以令我成為食肆化嘅工作單位；

好多金句，好多三亳子道理入袋，希望明年今日，全部會升幾個價位。

4A

2006-12-21T07:40:00.000-08:00

今年4A雖然已經過去，而賽果...視乎你英文水平有幾高！以下係個人暗啞底4A得獎名單：

最佳電視廣告歌曲：華燈閃閃動人夜色繽紛，漁光水影都市披滿感性，人間仙景星光閃爍璀璨，Grand Waterfront...wonderful world...
連白花油都有得唱，點解薰妮小姐呢首金曲加州紅仲未有得唱！？

最佳廣告演員：環球小姐Jennifer Hawkins
假如有一日我真係喺翔龍灣偶然咁撞倒Jennifer Hawkins，我會點吓頭，用英文問候一吓，然後我會走去攞選美報名表格。

最佳廣告文案：施丹禿頭都好睇，你呢？
有頭髮邊個想做癩痢？冇頭髮邊個想做施丹？
（其實仲有個最佳非廣告文案：忘記是人生天賜最大方法活到更好）

最佳效應廣告：禁煙條例立法廣告
小妹妹得意洋洋，好似打勝仗咁不停同人講：我地有救喇！我地唔使再食二手煙喇！作為一個非煙民，真係有衝動攞起枝醇薄荷萬。

最戇brief廣告：沙爹王
我一直深信呢個廣告背個brief係咁樣：總之要講起碼三次沙爹王好好食！而咁啱，做創作嘅人又真係做到喎！講真，沙爹王其實真係幾好食！

最佳廣告：德成僱傭
其實已經忘記呢個廣告幾時首播，但係德成女傭，已經融入家中！融埋入腦！早晨！我都係佢同胸喎！

保皇黨

2006-12-09T00:55:00.000-08:00

二零零六年十二月五日，可能係你朋友生日，同時都係泰皇蒲美蓬生日加上登基六十週年。

朋友生日，你可能會買件victoria secret嘅粉紅色內衣畀佢，然後喺party入面乘機講幾個咸濕gag等大家笑一餐；而泰皇生日，泰國人會著穿黃色衫或戴黃色手帶（因為蒲美蓬出生的週一代表色係黃色）以示對泰皇的尊重與祝福。於是，你會見到當日成個泰國都係黃衫人，比例好有可能係一比九九！走入百貨公司，會開始分唔到啲黃衫人係員工定係顧客，精神分裂！

泰國人對泰皇非常尊敬，而呢種尊敬係發自內心，絕對冇阿諛奉承嘅成份，因為泰皇係一個愛和平，信民主嘅君主，佢真心希望泰國人能夠個個活得開心自由。正因為呢種親密關係，今年九月中泰國軍事政變，過程異常地平靜，泰國國民完全信任泰皇嘅決定，我諗比起成日要睇北京政府眉頭眼額嘅政客，呢啲先係真正嘅保皇黨。

如果曾特首有呢種保皇黨嘅支持，可能佢生日嗰日全香港市民都會打煲呔為佢慶祝掛？好似都幾好睇喎！

給non-loser的信

2006-11-23T22:19:00.000-08:00

曾尊敬的non-loser：

我明白“言者無心，聽者有意“這句說話的意思，所以更不明白你為何會對言者無心的我作出指責，而非向聽者有意的他／她作開解，又或者將兩者找來當面澄清誤會？既然你認定這是解決事件的方法才找我，亦即說明你有既定立場，會否定一切解釋，那又為何故作中立？如果聽者一日未能釋懷，言者無心的說話總有一天會再刺進聽者有意的心裡，問題恐怕真的没有解決的一日。言者心裡不安，不知何時會說錯話，猜度誰是聽者，恐怕聽者會將自己的說話聯想到一個更負面的方向，不安，怨恨由此而生；聽者繼續將言者無心的說話對號入座，覺得言者的說話別有用心，心結自然綁得更緊，成為死結。

你認為一個只懂complain，而沒有solution的人就是loser。我不想為任何人的人生扣上自己的準則。但我想每個complain的人都希望有solution吧？complain本身是一個互動的行為，作用是希望被complain的人會從善如流，令事件得到一個雙方滿意的solution，否則那不會是complain，而是自怨自艾。相反，沒有complain的人，用compromise的態度去接受現狀而沒有為自己爭取過solution，比起complain的人對自己的人生更不負責。

我不想做一個被動和只會compromise的人，所以我選擇找solution，希望你也能在未來十年盡快找到自己的solution吧！

祝工作愉快順利

無心者上

救救狗狗

2006-11-16T19:34:00.000-08:00

北京被揭發以「不文明養犬」之名，欲捕殺所有身高超過35厘米的寵物狗，事件驚動不少愛護動物組織，發起不同反對活動，誓要拯救無辜狗隻。在大家不斷指責中國政府的不仁道的同時，大家亦對這個政府感到失望，可恥，無可救藥。其實每日中國都有不少弱勢社群被欺壓至死事件發生，好像礦難死傷者，公安濫用私刑，維權律師被打壓巫告等等，這就是專權統治下的社會生態，用無數生命換來經濟高速發展。如果這個政府不能走向開明，民主，維護人權，對弱勢照顧，對法制遵守，對濫權反抗，對異見包容，相信這些不仁道事件只會不斷發生，生命只會繼續被犧牲。

如果你覺得每個生命都應該被尊重，不妨多關心國內的不公義事件，把它傳開去，讓世界知道這個政府的所作所為，用群衆及傳媒的壓力迫他作出反省和改善，問題才會得到根治。不要怕一個人的能力有限或覺得浪費時間徒勞無功，因為選擇放棄就等如認同這個政府的行為，被欺壓的永遠不會有機會得到平反。

我相信每個生命都應該被尊重，不論他／牠是身高35厘米以上或以下。
http://www.thepetitionsite.com/takeaction/131317412?ltl=1163596573

八珍姨話你知：鳳凰四重奏

2006-11-13T07:54:00.000-08:00

佘詩曼憑住“鳳凰四重奏“奪得TVB頒畀自己人嘅最佳女主角，好多人都質疑賽果。一套講述四個年代人嘅故事，由古代做到現代，聽落真係高難度，頒個獎畀佢都好應該啫？但係有啲口痕友又會話一套劇做四個角色唔等如佢會做得好喎，每樣做少少咪仲易過骨！？佢之前做“金枝慾孽“呀，“西關大少“呀，“花樣中年“呀又唔見佢攞到（睇怕套東方之珠更加唔使講），唔通真係出精選就一定賣得咩？

嗱，佘詩曼嘅演技我就唔批評喇，但係八珍姨覺得最佳女主角其實應該頒畀另一個人，邊個？咪陳憑富珍囉！
陳太嘅“鳳凰四重奏“真係演得出神入化喇，由九七年禽流感爆發時佢扮演鎮定聲稱自己日日食雞唔使驚；到零三年沙士期間因國家機密加上內部協調混亂令香港疫情擴散，記唔記得嗰條喺公園圍住佢拍嘅宣傳片佢幾咁悠然自得呢；之後同年辭職（冇畀人炒）去咗世衛做助理總幹事，仲喺調查報告審訊期間返港表演聲淚俱下，楚楚可憐；到零六年終於喺中方大力支持之下得到世衛總事一職，將之前嘅枉事一筆鈎消，演活一個女强人嘅硬朗！可以將呢四個階段演得咁絲絲入扣，我諗點都好戲過佘詩曼喇掛！？

其實個女主角獎頒畀邊個都冇所謂，因為你都係會睇無線，你唔鍾意睇佘詩曼做戲咩，咪扭去明珠台睇“逃“囉，幾好！但係陳太呢台戲你去到邊都要睇，因為佢要做畀全世界睇嘛,希望佢做得好好睇睇啦！

失實報導

2006-11-02T22:56:00.000-08:00

將蘋果日報啲插圖畫過，係因為覺得佢畫嗰個據稱係靚仔設計師都唔靚仔嘅！？

SUNDAY

2006-10-27T04:37:00.000-07:00

公司安排了一個創意訓練課程。本來只是個很普通的公司課程，但當我們知道要在事前各自準備一份演講詞（其實只是填一份預設問卷）加一個簡報圖形電腦檔案並於課程中演說，心情就不安起來。為什麼？因為主持課程的人是個台灣來的導演呀！那應該用英語還是國語講呢？

我暗地裡對自己說：用國語吧！結果，鬧出一個大笑話，連我自己也笑得人仰馬翻（其實我笑是因為想起另一個笑話）！

這是一間“華“洋集處的公司，崇洋媚外的事比比皆是。高層人員（懂中文）的對話九成時間都是英語，中文充其量只是一個無關痛癢的助語詞。就算你的英語達到陳慧琳推介的職業英語水平，也不代表你可以在這公司抬起頭來。你必需要有比平常人的英語字庫多十倍的存量才足夠。舉個例，他們會在內部溝通時，為了顯示其英語能力，會挑一個本來和你今世無緣相見的英文字來代替一個很簡單的詞彙。最後又深怕你花時間查字典誤了工作時間，會體貼地用回那個簡單的詞彙替你解窘。此外，如果你欠缺一個國際性履歷，即是在紐約倫敦巴黎等國際大都會有好幾年的工作經驗，勸你最好盡快另謀高就。簡單來說，英語就是本公司權力核心的基本條件，國際化就是本公司的未來路向（難怪會聘用一位在英美打滾十多年的台灣導演）。

就是這種公司文化，另不少土生土長的人材流走。既然有機會可以用英語以外的語言溝通，何不來個無傷大雅的“宣示主權“？所以我明知道用英語講會容易點，但最後都選用了爛國語，以維護一個土生土長但仍待在這公司的小職員的少少尊嚴。

席上有位很高級的中文撰稿員對我的爛國語笑得特別起勁，希望他在嘲笑之後，會理解到背後的意義吧？我其實很保守，痛腳不會隨便露出來給別人看的。

前臺灣總統李登輝於九四年訪日時說過自己二十二歲前是日本國民，閒時會讀日文書籍，喜歡用日語交談，習慣用日文去思考，對日本文化高度推崇，好像忘記了自己是代表著一個被日本佔領過的國家元首，令臺灣人覺得難堪。其實用什麼語言溝通，絕對是自己的自由，但用什麼心態和身份去溝通，就是一另一回事。

施政報告

2006-10-17T21:24:00.000-07:00

芝華氏眼球星人被欽點到CCC星球出任行政狗官後，立即向CCC星人頒布三項全新政策，立即生效：
1) 提高防疫機制標準 --- 根據以往CCC星球的衛生標準，如發現有一團直徑五厘米或以上並於人流密集地帶所形成的巨形懸浮粒子(簡稱塵)，衛生局才會啟動置於物料存放處的抽真空清潔器進行消毒清潔。新政策將會要求CCC星人訂定清潔時間表及路線圖之餘，如發現芝華氏眼球星人排放出不定期“壓味性“液體或固體，CCC星人要即時通報，並即時消毒處理，不得延誤，務求令CCC星球保持無菌狀態。

2) 幼兒學語制 --- 有鑑於CCC星人溝通時話語有老化趨勢，由現在開始所有CCC星人與芝華氏眼球星人對話時必須保持以六歲或以下的語氣交談，如未能達標者會被要求進行十二小時迪士尼感化服務令。

3) 擴闊執拾基礎 --- 所有體積比芝華氏眼球星人口部細的非糧食類物體或可分解性物體（如廁紙）都不能放置於地面任何位置，如發現任何以上違規物體，CCC星人必須盡快執拾或將其棄置於堆填物料臨時收集站。

新政策將會即時執行，直到明年再作全面資詢收改。

細路

2006-10-11T04:39:00.000-07:00

如果有人叫你唔好咁 "細路"，即係叫你做人處事要成熟負責任，唔好任性一時衝動意氣用事，要有客觀嘅分析同對事唔對人嘅冷靜表現.....咁上下啦！但係細路呢種行為成日會出現o係好多成年人身上，例如：

陳水扁：出訪遭美方拒絕在美國本土過境後，臨時決定取消過境美國，浪費公帑另闢蹊徑輾轉飛往巴拉圭。

曾蔭權：面對泛民主派於立法會咄咄相逼追問政改問題，收起平日塑膠式親民笑容，黑面對答甚至怒罵，但理據依然令人難以信服。

金正日：無視國際警告，連好盟友中國強烈譴責亦不理，你愈講我愈唔聽，宣布成功進行首次地下核試。

你上司：雄心壯志，嚴詞厲色强迫員工全力支持一個對你暗地裡投不信任票的領導層，受挫後才訕訕說「打份工啫！咪問喇，做啦！」

你阿媽：因為你一個極度合理嘅原因而缺席親戚敍會，但係仍然會發茅話你唔關心屋企，一哭二鬧。

我其實都好想做細路，唔好畀啲大人知。

奇蹟

2006-10-03T09:53:00.000-07:00

問題：
如果你屋企人因病入o左ICU，你已經憂心忡忡，突然隔離有個貌似八珍姐/好姨咁嘅女士行埋o黎同你講：「等奇蹟啦！」
你估﹣﹣﹣

A) 佢對於你屋企人o既病情仲清楚過你同你個主診醫生，知道佢死梗，所以叫你等奇蹟啦。

B) 係口頭禪，就算你傷風感冒都會叫你等奇蹟。

C) 佢驚你屋企人真係死o左佢就冇o野八，所以叫你等奇蹟出現，唔好死住。

衷心希望唔會又多一個藝人上A1頭條，
衷心希望3週刊總編輯o既良心ICU都早日出現奇蹟。

GAG-100

2006-09-26T10:16:00.000-07:00

專門搜集爛gag嘅GAG-100今日正式啟用，保證對gag唔對人！以下係本週最新爛gag：

001：一對新人完成簽緍書及宣誓儀式後，新郎親吻新娘後被要求encore，此時證婚律師就話：新郎錫新娘兩啖喺法律上係冇問題o架，哈哈哈

002: 一對新人步入飲宴會場之際，司儀就話：嘩！一對新人又靚又後生，好似...食o左2036...羊胎素呀！哈哈

003: 你有冇聽過：“咸家鏟地齊種樹，後院池塘多鮫魚，晚來炊煙嫲撚飯，你老母兮親下廚“ 呀？好似講粗口o列？哈哈哈

o岩要求

2006-09-15T09:58:00.000-07:00

陳易希，於零四年奪得英特爾國際科學與工程大獎賽工程學二等獎，令他獲國際天文學會命名小行星的中五學生，近日獲香港科技大學破格取錄，成為本港首位直升大學的中五生。

陳亦羲，中六高考生，高考成績絕對符合升讀大學資格，練得一口流利普通話，英文程度更比陳易希好，但因為陳易希被取錄而痛失大學學位，正苦惱應該重讀或是投身社會。

唔公平？科大收生雙重標準？科大要出風頭？香港教育制度有問題？下年係咪考A-level之餘都要攞個國際獎先穩陣？

原來，要得到一個學位，就算你符合所有自己以為理所當然o既收生要求都未必會得償所願，因為總會有人有意無意打破常規，話你知原來有其他方法o架。呢個就係講求創新o既年代。

P.S. 陳易希係一個比喻。

再坐一會

2006-09-05T04:51:00.000-07:00

再坐一會　但願能再坐一會
我冇勁劈酒量　今宵這麼的晚
我說我已好鬼攰

＊再坐一會　但願能再坐一會
既要做o野　點盡量盡量逗留
六日就o黎冇

獨白：
再添紅酒一杯　請你多留一會
不求你做個細路
只想K後你盡量找數

情到此心中終於都清楚
唱Ko厄酒飲死硬
無言望發冷也已醉的曾生
比你我更加倦
誰人在扮晒o野對話語氣極糜爛
再禮貌地唱K　如何共你再說有o野做
求其話我係獨眼龍

獨白：
唔敢斟溝綠茶既酒　怕你心中誤會
但係一支清淡既啤　你又可曾收手呢

重唱＊

張呢首歌送畀一位任職於某公司o既創作總監，謹祝工作順利。

我要成名

2006-09-04T09:11:00.001-07:00

Wyman話過：「我寧願得唔到獎，人o地戥我唔抵，好過我得到獎，有人覺得我唔值。」呢句o野確係唔少人o既自我超渡良方，夠晒得體大方，絕對係落台佳品。

劉青雲，一個有五次提名金像獎都落空o既香港男演員，佢o的戲真係比劉華周星馳梁家輝黃秋生梁朝偉差？佢o的戲真係連金馬影帝黎明郭富城都不如？從來冇因為得唔到獎而自嘲或者發嘮o蘇呻唔公平唔甘心，只有默默繼續做好每一齣戲。

「我要成名」入面劉青雲講過（大致意思）：「我好高興得到呢個獎，但係當我知道之前攞呢個獎o既係o個個人，我就------妖！」呢一句雖然唔得體（所以唔o係台上講），但係我鐘意！

買旗

2006-08-28T09:40:00.000-07:00

星期六買旗！機會率比捉到到打何俊仁幕後凶手還要低。

星期六早上係我警覺性最低o既時候，要打劫我絕對係吉時。但係當我蒙蒙曨曨之際買o左旗之後，咦喂？
舊時買旗，張旗一定會不明文規定地貼o係心口位置，但係點解呢位姐姐仔會貼o左張旗上膊頭附近？喂佢矮過我o架喎！
心口幾時變o左禁地？貼張貼紙都驚畀人話你胸襲？道德水平真係提升到超級撒亞人境界？

咁點解一本便利（阿嬌bra解o個期）會再版都賣晒？

Gold要求

2006-08-25T09:41:00.000-07:00

每個人都可以對成就呢樣o野有要求，而要求準則亦可以由自己製訂，虛浮程度直迫勁歌金榜。你o既金獎隨時會係我o既安慰獎，根本無高低之分，亦無需深究箇中因由，問都戇居。

我明明想拍套Charlie Chocolate Factory，點解硬係要迫我拍套Titanic呢？Titanic確係攞到Oscar，但係唔係我杯茶！仲要話我知就算拍到Cold Mountain係唔夠o架，一定要係Titanic先收課！又一個資源錯配o既悲劇。

兩亳子o既道理，當放諸現實生活，原來仍然好難執行。

大蝦細畀屎餵

2006-08-24T08:34:00.000-07:00

畀同學仔蝦，可以向先生投訴；畀黑社會蝦，可以向警局投訴；但係畀大財團蝦，可以向邊個投訴呢？

富士康(Foxconn)，向國內o既第一財經日報起訴，指佢地報導該公司剝削國內生產ipod工人o既情況失實，嚴重影響公司聲譽，
分別向編輯和記者索償3000萬人民幣的賠償, 兩人的資產被法院凍結。
http://www.inmediahk.net/public/article?item_id=148006&group_id=11

問題係，呢個報導唔止第一財經日報有報導，英國o既BBC同Mail on Sunday都有報導，點解唔告埋佢地呢笨？

Top 3

2006-08-23T08:28:00.000-07:00

本公司熱播廣告三甲：

第三位！
人地唔係你個仔，你又未必係人地個仔
夠竟你會唔係人地個仔o既 ---- 別人的仔

第二位！
你有愛滋我唔知，我有冇愛滋你都未必知o既 ---- 關懷愛滋

第一位！
買便利因為要八，買六合彩最好要發
但係買眼鏡千祈唔好抺o既 ---- 眼鏡88

有冇人complain？

2006-08-14T10:44:00.000-07:00

如果欣兒扮白雪公主都咁多人投訴，咁吳卓羲將 "johnny depp" 讀做 "johnny deep" 就更加應該投訴啦？咁搞個 "我最想非禮女藝人" 選舉都咁多人投訴，點解無線搞 "誰是首輪被淘汰佳麗電話競猜遊戲" 會冇人投訴呢？

做乜挑釁我？

2006-08-14T04:28:00.000-07:00

友人一口咬定猶太人可惡，侵略巴勒斯坦領土，巴勒斯坦才發動恐佈組織還擊，抵死, 但對以巴衝突起因及其和平進程都不大清楚。有堅定立場其實係幾好，但係有既定立場就幾得人驚。所謂恐佈組織o既自殺式擊真係理所當然？以色列自衛性侵略又真係迫不得已？以巴真係冇人真心想用和平方法解決事件？真係萬般帶不走？

華！

2006-08-07T01:58:00.000-07:00

如果劉華難頂，江華其實仲難頂！但係話江華難頂，原來劉江華係最難頂！截取通訊及監察條例究竟係以維護市民私穩免受侵犯為大前提而立法還是要方便政府各部門捉拿大賊呢？

寫乜好？

2006-07-10T00:21:00.000-07:00